इंदापूरच्या गुणवंतांचा पतंजली योग परिवारातर्फे गौरव; योगरत्न दत्तात्रय अनपट यांच्या हस्ते सन्मान ​ज्येष्ठ पत्रकार काकासाहेब मांढरे, इस्रोची तनिष्का फलफले व मॅरेथॉन वीरांचा विशेष सत्कार

स्टार केबी न्यूज
​इंदापूर (प्रतिनिधी)( दि . २०फेबुवारी ):
विविध क्षेत्रांत उल्लेखनीय कामगिरी करून इंदापूर तालुक्याचा नावलौकिक देश-विदेशात पोहोचवणाऱ्या गुणवंतांचा पतंजली योग समिती, इंदापूर यांच्या वतीने विशेष गौरव करण्यात आला. पतंजली योग समितीचे प्रमुख योगरत्न श्री. दत्तात्रय अनपट यांच्या हस्ते आणि प्रमुख योगसाधकांच्या उपस्थितीत हा हृदयस्पर्शी सन्मान सोहळा आज संपन्न झाला.
​याप्रसंगी सामाजिक क्षेत्रातील योगदानाबद्दल ज्येष्ठ पत्रकार व समाजसेवक काकासाहेब मांढरे यांना ‘महाराष्ट्र गौरव सन्मान’ मिळाल्याबद्दल त्यांचा विशेष सत्कार करण्यात आला. पत्रकारितेच्या माध्यमातून सामाजिक प्रश्नांना वाचा फोडणाऱ्या मांढरे यांच्या कार्याचा यावेळी गौरवपूर्ण उल्लेख करण्यात आला.
​मॅरेथॉनवीरांनी ओलांडल्या सीमा
दक्षिण आफ्रिकेतील कठीण समजली जाणारी ९० किलोमीटरची मॅरेथॉन स्पर्धा अवघ्या १० तासांत यशस्वीपणे पूर्ण केल्याबद्दल श्री. संतोष वाघचौरे, श्री. संदीप जाधव आणि श्री. गोपीनाथ मोरे यांचा सन्मान करण्यात आला. इंदापूरमध्ये ‘इंद्रेश्वर मॅरेथॉन’चे यशस्वी आयोजन करून इंदापूरकरांना आरोग्याचा नवा छंद लावल्याबद्दल त्यांचे कौतुक करण्यात आले.
​इस्रो आणि शिक्षणातील सुवर्ण भरारी
भारतीय अंतराळ संशोधन संस्थेत (ISRO) प्रशिक्षणार्थी म्हणून निवड झाल्याबद्दल कु. तनिष्का आत्माराम फलफले हिचा गौरव करण्यात आला. तसेच, अत्यंत कठीण समजल्या जाणाऱ्या JEE परीक्षेत घवघवीत यश मिळवल्याबद्दल राज घाडगे, श्रेयस बोंगाणे आणि अभिनव गटकुळ या विद्यार्थ्यांचेही विशेष कौतुक करण्यात आले.
​आंतरराष्ट्रीय स्तरावर क्रीडा नैपुण्य
क्रीडा क्षेत्रात आंतरराष्ट्रीय बेसबॉल संघात निवड झाल्याबद्दल अक्षय बाळासाहेब मोरे आणि आंतरराष्ट्रीय कुराश शालेय स्पर्धेत प्रथम क्रमांक मिळवल्याबद्दल अथर्व सचिन मोरे यांचा सन्मान करण्यात आला. या खेळाडूंनी इंदापूरचे नाव जागतिक नकाशावर कोरल्याची भावना यावेळी व्यक्त करण्यात आली.
​मान्यवरांची उपस्थिती
या सोहळ्याप्रसंगी पतंजली योग समितीचे विविध पदाधिकारी, योग शिक्षक, योग शिक्षिका तसेच योग साधक आणि साधिका मोठ्या संख्येने उपस्थित होत्या. योगरत्न श्री. दत्तात्रय अनपट यांनी आपल्या मार्गदर्शनात सर्व गुणवंतांचे अभिनंदन केले आणि “अशा कर्तृत्ववान व्यक्तींमुळेच समाजाला नवी प्रेरणा मिळते,” असे प्रतिपादन केले. कार्यक्रमाची सांगता उत्साही वातावरणात करण्यात आली.